Natagak sa fishpond namatay

CEBU, Philippines - Patay ang usa ka 70-anyos nga lolo human kini gituohang nadakin-as ug natagak sa fishpond daplin sa dalan sa Purok-1 barangay Bato siyudad sa Toledo niadtong Miyerkules sa alas 11:00 sa buntag. Ang patay nang nakit-an mao si Eugenio Sarcos, 70, nagpuyo ra sa nahisgutang lugar. Matud pa ni SPO3 Gil Lastimosa sa Toledo City Police dihang nahinabi sa Banat News  nga naglakaw ang biktima gikan sa ilang pinuy-anan ug pag-abot sa maong fishpond nadakin-as ug natagak sa fishpond nga dunay tubig ug nalumos.

Nadiskubrehan nalang ang biktima ni Warlito Luki-luki nga nagkulob sa fishpond hinungdan nga gitabang dayun nila kini apan nasutang patay na, nasuta usab nga nagluya na kini sulod sa pipila ka adlaw. – BANAT NEWS