Opisyal namunal og 2 ka bata relibohan

CEBU, Philippines - Giparelibohan sugod kagahapong adlawa si Insp. Gerardo Fiel sa Talamban Police Station human gipasanginlang nangulata sa duha ka mag-agaw nga minor de edad niadtong Domingo. Si Sr. Supt. Patrocinio Comendador, direktor sa Cebu City Police Office, nagkanayon nga gimanduan na niya ang iyang chief sa administration sa pagparelibo kang Insp. Fiel ug ibutang sa administration office samtang nagpadayon ang imbestigasyon batok niya.

Sumala pa ni Comendador nga iya na hinuong gika-estorya si Sr. Insp. Ranulfo Ezpina, hepe sa Talamban Police Station labot ning maong isyu ingon man pagparelibo kang Insp. Fiel.

Gipadayag niini nga mas makaayo kun anha sa administration ang imbestigasyon tungod kay ang kaso giduso sa duha ka mga minor de edad nga sila si Nino, 16, taga Carmen ug Erland, 17, taga Basak Mandaue sa People's Law Enforcement Board (PLEB).

Ang CCPO magpaabot sa desisyon sa PLEB sanglit mahimo kining mosang-at og kasong administratiba o kriminal sa Ombudsman for the Military batok ni Insp. Fiel. Apan kun ang duha ka bata modangop sa CCPO, andam silang mopasaka og kasong kriminal.

Nasayran nga ang mag-agaw gidakop sa mga sakop sa Talamban Police Station human gipasanginlang nangawat og scrap metal diha sa Pit-os niadtong Domingo.

Apan gi-turnover ang duha ngadto sa Presinto 3 sa Basak, dakbayan sa Mandaue ug didto nadiskubrehan sa mga ginikanan nga gikulata gumikan sa ilang mga bun-og sa lawas.

Ang mag-agaw mipasangil nga gipaluhod sila nga gipatalikod nga gibunalan og silhig ingon man gisukmag sa shift supervisor nga si Insp. Fiel dihang gidetiner sa Talamban Police Station. – BANAT NEWS