CEBU, Philippines - Usa ka monghe sa Lindogon sa Simala sa lungsod sa Sibonga nga gipalagpot na isip sakop sa maong kongregasyon miakusar sa maong relihiyosong pundok nga nangwarta sa mga parokyano ug duna pay daghang mga anomalyang gipanghimo.
Si Venancio Cabillon nga nagdala sa relihiyosong pangalan nga Frater Paul Mary, kanhi monghe sa Marian Monks of the Eucharistic Adoration sa Simala sulod na sa 17 ka tuig pormal nga mi-resign niadtong petsa 8 sa bulan sa Enero tuig 2009 gumikan sa giingong mga anomaliya sa iyang Superior nga dili na niya maantos.
Si Cabillon mipasangil nga daw gihimong negosyo na ang pagka-relihiyoso sa mga tawo pinaagi sa pag-overpriced sa mga relihiyosong materyales nga mapalit diha sa maong simbahan.
Matud pa ni Cabillon nga ang imahe sa Birhen nga napalit lang og P300 ibaligya og P1,500, ang bracelet nga P4 ibaligya og P45, ang mga sinaw nga klase sa bracelet nga P20 gibaligya og P150, samtang ang rosaryohan nga P100 gibaligya og P350.
Sumala pa niini bisan pa sa iyang pagbadlong sa ilang Superior nga si Frater Martin Mary, kansang tinuod pangalan mao si Martin Mangila wala gihapon kini mopatuo.
Matud pa niya nasagmuyo gyud siyang ang mga kabus nga debotos walay mapalit inig duaw sa Lindogon gumikan sa kamahal nga alang kaniya butang nga di ikalipay sa Mahal nga Birhen.
Laing giingong gipaburot og maayo mao ang presyo sa kandila nga tag P15 sa gawas, apan P35 na kini diha sa sulod human gimugnaan ni Fra. Martin og 13 ka mga kolor nga dunay mga kahulugan.
Samtang ang imahen sa Birhen nga pinalit lang sa barangay Tayuman sa Manila gipatuong gikan sa usa ka langyaw ug kini milagroso.
Gibutyag usab niyang dili orihinal nga Birhen ang naa karon sa simbahan sa Lindogon gumikan kay niadtong tuig 2003 gikasabutan sa mga monghe nga ilisan kini ug dad-on na ngadto sa Leyte.
Samtang dugang gibutyag ni Cabillon mao ang giingong pagpahigayon ni Fra. Martin og usa ka Miss Gay atol sa ilang Silver Jubilee Anniversary niadtong tuig 2008 gumikan kay sila alagad sa simbahan ug dili maayong makita sa mga parokyano ang maong pasundayag nga gitambungan sa katawhan sulod mismo sa Simala.
Ang tanang mga alegasyon ni Cabillon iyang gipagawas gumikan sa iyang kasubo nga sa dihang migawas na siya sa ilang kongregasyon ug nagpakahilom nakugang siya sa migawas nga publikasyon sa pamantalaang Lungsoranon.
Niadtong Aogusto 9, 2009 nakugang siyang gipatik ang usa ka notisya nga nagpahibalong siya gi-dismiss na ni Cebu Archdiocese Ricardo Cardinal Vidal lakip na ang rason sa pagtaktak kaniya diha sa pahina 2.
Usa sa mga rason sa pag-dismiss kaniya sa kongregasyon mao ang pasangil nga kini usa ka trafficker sa ilang mga miyembro, nakahimo og bug-at nga kalapasan sa ilang gipanumpaang relihiyosong panaad ingon man ang paglapas niya sa chastity ug obedience, kining duha ka uwahing kalapasan gipatik gyud sa dagkong letra.
Gidid-an na siyang makagamit sa pangalan sa maong pundok alang sa bisan unsang katuyoan ug gidid-ang makasulod sa bisan asang panimalay sa ilang pundok.
Gisuwayan pakigkitaan sa Banat News si Fra. Martin sa Lindogon aron pagkuha sa ilang habig apan ang Head Guard sa maong simbahan nga si Christopher Gimuya mipadayag nga kanunay'ng wala sa iyang buhatan si Fra. Martin.
Duha ka mga deboto sa Birhen Maria diha sa maong simbahan nga naabtan sa Banat News ang mipadayag sa kasagmuyo sa mga alegasyon ni Cabillon, matud pa nila nga makita sa mga gipangtukod nga edipisyo ug proyekto ang gidad-an sa halin sa mga religious articles ug mga donasyon. – BANAT NEWS