2 ka kawatan nadakpan sa kapolisan

CEBU, Philippines - Duha ka giingong notadong mga kawatan, usa niini menor de edad kinsa gipasanginlang milungkab sa usa ka dakong tindahan sa hardware sa lungsod sa Minglanilla, nasikop sa gipahigayong follow-up operation sa mga polis niadtong Lunes sa buntag.

Mikabat sa kapin P80 mil ang kantidad sa nadalang mga butang sa mga suspetsado diin ang uban niini nakuha pagbalik sa kapolisan.

Ang nasikop mao si Junjie dela Calzada, hingkod, ug ang 17-anyos nga giingong iyang kauban, pulos taga Poblacion, Ward IV sa nahisgutang lungsod.

Laing gikatahong kauban sa duha nga si Wilfredo Baraclan Jr.,kinsa silingan ra usab nila gipangita pa karon sa mga polis.

Ang biktima mao ang Big Brother Home Depot nga nahimutang sa maong lugar diin ang piniyalan nga si Alma Cabanero, 32, maoy nakadiskobre nga gilungkab na ang tindahan sa pagpangabli niya niini   niadtong Lunes sa buntag.

Si Inspector Leoncio Baliguat Jr. hepe sa Minglanilla Police Station mibutyag sa Banat News kagahapon nga ang mga kawatan mikatkat sa koral sa nahisgutang tindahan ug dihang nakasulod na giguba dayon ang door knob sa main door.

Nadala sa mga suspetsado ang usa ka set nga personal computer nga nagkantidad og P20,150.00, 10 ka kahon nga mga wire, P32,500.00; lima ka door knob, P26,000; lima ka pylox spray, P1,920.00; box gold spray, P975.

Si Baliguat uban nila ni SPO3 Razul Cegismar, PO3 Allen Garciano, PO3 Roland Camello ug PO3 Christopher Castro maoy mipahigayon og follow-up operation nga misangpot sa pagkasikop sa mga suspetsado.

Nakuha sa kapolisan gikan sa mga suspek ang usa ka set nga personal computer, solid wire nga 1.6 mm ug dunay gitas-on nga 150 metros, duha ka flat cord wire nga 1.6 mm nga may 150 metros ang gitas-on, solid wire nga 2.0 mm nga 150 metros ang gitas-on, solid wire 3.5 mm nga dunay gitas-on nga 150 metros ug hose nozzle.

Matud ni Baliguat nga ang nahisgutang mga suspetsado may mga record na sa pagpanglungkab sa mga dagkong establisamento ug mga balay. – BANAT NEWS