CEBU, Philippines - Gibasura gihapon sa Cebu City Traffic Operations and Management (Citom) ang mosyon nga gipadangat sa Basilica del Santo Niño labot sa gipatas-ang rota niini sa prosesyon subay usab sa kapistahan sa Balaang Bata sunod tuig.
Ang Basilica del Santo Niño gustong mugamit sa dalan V. Rama, B. Rodriguez, ug General Maxilom Avenue pagpahigayon sa sunod tuig nga prosesyon.
Apan gibasura sa Citom ang hangyo sa kadagkuan sa simbahan tungod sa paggamit niini sa V. Rama Avenue alang sa nahisgutang relihiyosong kalihukan.
Nagtuo ang Citom nga moduso og laing rota sa prosesyon ang Basilica apan kini mipadangat hinoon og rekonsedirasyon sa unang request niini nga gibasura.
Gipasabot ni Citom executive director Arnel Tancinco nga dili mahimong gamiton ang dalan V. Rama tungod kay kini lang ang giingong access road sa south district.
“Ang ila man gong gusto nga moagi sa V. Rama, gi-deny namo kay ang V. Rama mao ray alternative diversion gikan sa south nga traffic, dili gyud madala,” sumala ni Tancinco.
Nasayran nga ang kadagkuan sa Basilica nagpatabang kang Konsehal Arsenio Pacaña ug acting mayor Michael Rama sa pagpadala niini og mosyon sa Citom. – BANAT NEWS