CEBU, Philippines - Gibutyag ni Provincial Election Supervisor Leonel Marco Castillano nga sulbad na ang problema sa publiko bahin sa mga paagi kun unsaon ang pagbotar sa taliabot nga modernong automated election sa 2010.
Kini human matudlo isip tigpamaba sa Commission on Elections (Comelec) sa probinsya sa Sugbu ang election officer sa lungsod sa Borbon nga si Alex Villacruses.
Matud ni Castillano nga si Villacruses maoy gitahasan sa pagpahigayon og lecture seminar sa tibuok Sugbu kabahin sa pagpangandam sa umaabot nga piniliay sa sunod tuig.
Si Villacruses maoy mohatag og dugang impormasyon sa publiko alang sa mga paagi sa pagbotar sa piniliay nga sa unang higayon gamitan og mga makinarya sa computer.
Ang pagbutang kang Villacruses sa maong katungdanan gihimo human madawat sa Comelec ang nagpungasi nga pangutana sa katawhan kun unsay ilang buhaton nianang poll automation.
Matud pa ni Castillano nga anaa ang tanang tubag ug kasayoran ning tanan kang Villacruses. – BANAT NEWS