CEBU, Philippines - Mibalik na pagsaka ang mga hayop nga gipaihaw sa ihawan sa dakbayan sa Talisay, matud ni Erma Abarquez, in charge sa slaughter house sa siyudad.
Si Abarquez sa pakighinabi sa Banat News nagkanayon nga wala na sila modawat og mga baboy nga adunay gibug-atong 200 kilos diha sa ihawan kay kasagaran niini pulos mga anay.
Matud pa ni Abarquez, ang bug-at na kaayong baboy mao usay makalangan sa inihaway ug makaguba usab sa makina nga panangtang sa balhibo.
Miingon si Abarquez nga kaniadto adunay 30 ngadto sa 50 ka baboy sa nahisgutang gibug-aton nga ipaihaw sa matag gabii diha sa ihawan.
Ang ihawan sa Talisay nga double “A” standard kwalipikado na nga mosalmot sa national contest isip “best slaughter house”.
Sa pagkakaron si Abarquez miingon nga sa normal nga mga adlaw nga walay okasyon adunay 100 ngadto sa 150 ka baboy ang ilang maihaw gikan sa alas 9:00 sa gabii ngadto sa alas 5:00 sa buntag hangtod sa alas 2:00 sa hapon. - Brenda D. Batuto (BANAT NEWS)