CEBU, Philippines - Natusak sa mga bala ang lawas sa usa ka tawo human kini pusila sa wala hiilhing mamumuno duol sa barangay hall sa Duljo Fatima sa dalan Spolarium, ning dakbayan sa Sugbo pasado alas 12:00 kagahapon sa kaadlawon.
Ang biktima nailhan nga si Christian Quidato, 31, nga taga sitio Riverside, sa nahisgutang barangay.
Nasayran nga samtang paatubang na unta nga mo-duty ang duha ka barangay tanod nga sila si Raymund Delgado ug Camilo Batasin-in, kalit lang nga nakadungog sila og mga buto sa armas de fuego sa gawas nga bahin sa barangay hall.
Sa dihang gisusi nila ang gigikanan sa maong mga buto mao nalay ilang nakita ang lawas sa biktima nga nangabuslot na sa bala ug naglunang na sa kaugalingon niyang dugo nga wala nay kinabuhi.
Ang mga molupyo sa maong lugar nagkanayon nga ang biktima kinsa usa usab ka manuyopay sa maong lugar sa wala pa pusila mipasalba kini makaduha ka higayon sa iyang armas de fuego.
Hinungdan nga nangurog sa kakuyaw ang mga silingan, apan giingong may tawo nga imbis mokurog sa kahadlok, nangurog na hinuon sa kaisog nga maoy mitusak og mga bala sa lawas sa biktima.
Walay nakailang mga silingan sa maong mamumuno, matud pa nila ni Delgado ug Batasin-in. – BANAT NEWS