Sad-an sa Balili deal mailhan na

CEBU, Philippines - Mailhan ug matumbok na sulod niining semanaha kun si kinsa ang dunay dakung tulobagon sa natigayun nga bulilyaso nga pagpalit sa Kapitolyo sa Balili property sa Tinaan, Naga nga gibayran og sobra sa 98 milyones pesos bisan og dakung bahin niini naglubog sa tubig ug kabakhawan. Mao kini gipadayag ni majority floor leader bokal Victor Maambong human dunay bag-ong mga saksi nga mohatag og dugang mga testimoniya kabahin sa maong kontrobersiya karong Huwebes. Gibutyag ni Maambong nga dunay ubang mga opisyal sa Kapitolyo nga dunay kasayuran kabahin sa maong transaksyon apan pabilin kining nagpakahilom tungod kay mahadlok motug-an sa matuod.

Nunot niini gisumbalik ni Maambong si Bokal Juan Bolo human namahayag kini atol sa iyang privilege speech nga mi-insister nga silang tanang sakop sa Hunta ang angayang basulon tungod kay ilaha man kining gi-aprobahan ug dili kay siya lang.

Apan matud ni Maambong tinuod nga duna sila'y gamay'ng sipyat sa Hunta ug kini mao ang paghatag og authority ni Gobernador Gwendolyn Garcia nga makasulod sa maong transaksyon pagpalit sa maong luna. Apan gipasabot ni Maambong nga mas dako og tulobagon si Bolo tungod kay gihulagway niyang kini ra maoy mi-monopoliya sa negosasyon sa palit gikan sa pagpakig negosasyon ug sa pagsulod na sa appraisal committee ngadto na sa pag-preparar sa tanang mga dokumento, paghimo og notaryo sa deed of absolute sale nga wala pa gani iagi sa Provincial Attorneys Office. Gidugang ni Maambong nga iyahang namatikdan karun ilabina atol sa pagpadayon sa imbestigasyon niadtong miaging adlaw nga buot lang karun ni Bolo nga mamahid nilang tanan sa Hunta sa maong bulilyasong transaksyon.

Si Maambong nagkanayon nga utingkayon gyud nila sa Hunta kutob sa ilang mahimo nga molutaw gyud ang kamatuoran ug ang responsable sa maong natigayon nga palpak nga transaksyon. Samtang atol sab sa pagpadayon sa hearing sa Hunta sa miaging adlaw gi-presentar sa kadagkuan sa Department of Environment and Natural Resources (DENR-7) ang resulta sa gihimo nilang ground survey sa Balili property diin nagpakitang 4.5 hektaryas lang sa 24.7 hektaryas ang yuta ug ang dakung portion niini kabakhawan gyud ug naglubog sa tubig nga dili mahimong matitulohan. – BANAT NEWS