Depositor sa Rural Bank nalipay

CEBU, Philippines - Gihangop sa mga depositor sa Rural Bank of Subangdaku sa dakbayan sa Mandaue ang lakang nga gihimo sa konseho sa maong dakbayan nga nag-awhag sa Philippine Deposit Insurance Corporation (PDIC) ug Bangko Sentral ng Pilipinas (BSP) sa paghatag og mga kasayuran sa mga depositor kun kanus-a sila kabayri niini.

 Ang mga depositor nga biktima sa kalit nga pagtak-op sa maong bangko niadtong Enero niining tuiga mibutyag sa Banat News nga nakahatag kaayo og dakong kadaut sa ginagmay nilang negosyo ang pagsira sa maong bangko.

Si Amelita Torigosa nga taga Banilad, dakbayan sa Sugbo nga usa sa mga depositor sa maong bangko nga nahinabi sa Banat News   miingon nga ang lakang nga gihimo sa konseho sa dakbayan sa Mandaue mao usab unta kini ang himoon sa uban pang dapit. Matud pa niya nga alang kanila, dako og ikatabang kanilang mga depositor ang gihimo sa konseho sa dakbayan sa Mandaue aron sa pagpukaw sa nahinanok nga mga opisyal sa PDIC ug BSP.

Sa nasayran, si Konsehal Emiliano Rosal nga maoy chairman sa committee on appropriation, budget and finance sa konseho sa maong dakbayan maoy nangamahan sa usa ka resolusyon nga nag-awhag sa PDIC ug BSP sa paghatag og tukmang kasayuran sa kahimtang sa claim sa mga depositor. (BANAT NEWS)