CEBU, Philippines - Luyo sa iyang maskara nga “pro-poor” sumala pa ni Senador Panfilo Lacson nga si kanhi Pres. Joseph Estrada protektor sa jueteng, padrino sa mga smugglers ug hambugero.
Si Lacson, atol sa iyang privilege speech sa hawanan sa Senado kagahapon, nagkanayon nga si Estrada posibleng maoy nagpaluyo sa Dacer-Corbito murder.
Matud ni Lacson nga si Estrada mangunay sa paghatag og kamanduan (direct orders) sa mga ahensiya, lakip na ang Philippine National Police ug Presidential Anti-Organized Crime Task Force (PAOCTF).
“God save the Philippines from Joseph Estrada,” matud ni Lacson. “On so many occasions, and I have personal knowledge on this, during his presidency, he was giving direct orders and instructions deep into the layers of the entire government bureaucracy, the PNP and the PAOCTF,” si Lacson nagkanayon.
Sa sayo pa, si Estrada ug Lacson gilambigit sa kanhi miyembro sa PAOCTF nga si Cezar Mancao II sa kamatayon ni Salvador “Bubby” Dacer ug drayber niining si Emmanuel Corbito niadtong 2000.
Gikuwestiyon usab ni Lacson ang press statement ni Estrada nga nagkanayong siya'y nagsuperbisar sa Oplan Delta, ang operasyon pagpapatay kang Dacer.
“Mabuti pa si Mr. Estrada, alam niyang may Oplan Delta. Ako, sa mga pahayagan at kamakailan ko lamang narinig at nalaman na mayroon palang Oplan Delta,” si Lacson nagkanayon, kinsa midugang, “sa halip na i-depensa na lang niya ang sarili niya, bakit siya kailangang magturo ng iba?”
Matud ni Lacson nga nagkalalis sila ni Estrada tungod sa pagsupak niya sa awhag sa kanhi presidente samtang didto sila sa Malacañang nga mo-“lie-low” siya sa operasyon batok sa mga jueteng lord tungod kay naghatagan kini kanila og kuwarta.
“Mr. Estrada had unofficially declared me persona non grata in the Palace. I was practically in the doghouse for an unusually extended period of time. Mr. Estrada would not talk to me. He was dealing directly with my subordinate officers, both at the PAOCTF and the PNP, which I both headed in concurrent capacity.”
Gibutyag usab ni Lacson nga niadtong 1998, gigamit ni Estrada ang kapolisan aron i-pressure si Alfonso Yuchengco aron ibaligya niini ang shares sa Philippine Telecommunications Investment Corporation ngadto sa laing negosyante nga si Manuel Pangilinan.
Sumala pa niya nga ang kapolisan maoy nang-harass ni Tito Yuchengco pinaagi sa paghadlok pagpasaka og kasong kalapasan sa balaod batok sa drugas.
Nasayod si Lacson nga nasuko ang mga Yuchengco kaniya tungod sa pagtuo nga siya'y gisugo ni Estrada aron harason si Tito ug mapugos ang amahan niini pagbaligya sa shares sa PLDT ngadto ni Pangilinan.
Si Senador Jose “Jinggoy” Estrada, anak sa kanhi presidente, mibarog human sa privilege speech ni Lacson ug nagkanayon nga andam siyang mosulti sa hawanan sa Senado kalabot sa nahibaw-an niya kang Lacson kun magpadayon kini og sulti o “bakak” batok sa iyang amahan. (John Rey Saavedra, Acting Editor-in- Chief) (BANAT NEWS)