CEBU, Philippines - Mas maayong boluntaryong mobakasyon si Bokal Juan Bolo sa Hunta Probinsyal human ilambigit sa kontrobersyal nga pagpalit sa Kapitolyo sa Balili property.
Kini maoy tambag ni Cebu City Councilor Hilario Davide III nga mipadayag na usab og kaandam pagpapili pagka-bise gobernador sa lalawigan sa 2010 elections.
Ang konsehal maoy nagustuhan ni Mayor Tomas Osmeña nga ipares kang Tourism Secretary Ace Durano kung kini makadesisyon nga mag-gobernador sa Sugbu.
Matud ni Davide nga aron dili kadudahan si Bolo nga ni-interbiner sa gipahigayong imbestigasyon, mas maayong kini mopahuway lang una sa iyang katungdanan.
Una nang mitambag si Kongresista Eduaro Gullas kang Bolo nga kini paluwaton sa katungdanan tungod sa pagkalambigit niini sa kontrobersiya, butang nga gisupak usab sa board member tungod kay giingong wala siya'y gihimong kasaypanan sa iyang pagpangatungdanan.
Miluwat na hinoon si Bolo sa iyang katungdanan isip chairman sa Committee on Real Properties sa Hunta Probinsyal pipila ka semana na ang nakalabay.
Apan matud pa ni Davide nga dili gihapon makalusot sa kiha ang mga opisyal sa probinsya niini, gawas sa iyang pagduda nga kuli nang mabawi ang kwarta. (BANAT NEWS)