CEBU, Philippines - Ang usa ka negosyante og karne kinsa mireklamong tikasan kuno ang timbangan sa ihawan sa Talisay, nakapagawas og karne nga dili iyaha unya gaan og timbang kay sa kaugalingon niyang baboy nga gipaihaw sa maong ihawan, sumala ni Erma Abarquez, ang piniyalan sa slaughter house sa dakbayan sa Talisay dihang nahinabi siya sa kagahapon .
Matud pa ni Abarquez nga sa miaging semana si Alan Alcuiza, usa ka negosyante og karne nagpaihaw og baboy diha sa ihawan sa Talisay nga may gibug-aton nga 45 kilos, base sa timbangan sa maong ihawan sa dayon na niyang paggawas niini.
Apan naunsang pagkaunsaa nga sa dihang iya kining gitimbang sa kaugalingon niyang timbangan , igo ra gyung nakaabot og 34 kilos, hinungdan nga mihiwasa ug mikisikisi si Alcuiza sa kapungot.
Kini maoy hinungdang nga gipasanginlan ni Alcuiza nga tikasan ang timbangan sa ihawan sa Talisay. Apan dali kining gipanghimakak ni Talisay City Administrator Richel Bacaltos kinsa nagkanayon nga dili mahitabong mosipyat ang timbangan sa ihawan sa gobyerno tungod kay gikalibrar kini sa Department of Science and Technology (DOST).
Si Abarquez nagkanayon nga sutaon nila karon kun kinsay nagdanghag niining hitaboa, tungod kay nasuta niya sa dihang iyang giimbistigar ang maong problema, karne sa laing negosyante ang nadala ni Alcuiza hinungdan nga mas gaan ra kay sa iyang kaugalingong baboy nga gipaihaw. – BANAT NEWS