Girakrakan lima ang naangol

CEBU, Philippines - Lima ka mga batan-on ang nangaangol human gipaulanan og bala sa tulo ka wala mailhing lalaki sa eskina sa dalan B. Aranas ug J.M. Basa Street sa barangay San Nicolas Proper pasado alas tres sa buntag kagahapon.

Ang lima ka mga samdan nailhan nga sila Junrey Pude, 19, Jomar Jumawan 19, ug Julito Arresgado, 24, mga trabahante sa Felipe Go Mktg. samtang laing duha ka mga traysikad driver nga sila si Rodrigo Mahinay, 36 ug Rolando Pise, 38. 

Sa pasiunang imbestigasyon sa kapolisan nasayran nga ang tulo ka trabahante naglingkod sa gutter sa nahisgutang lugar gikan sila nga nag-inom samtang ang duha ka traysikad drayber naglingkod diha sa ilang sikad kay nagpaabot og pasahero.

Apan sa kalit lang, adunay tulo ka lalaking mipatim-aw ug walay daghang pasumangil gipangrakrakan sila niini.

Ang lima nangaigo sa nagkadaiyang parte sa lawas, si Pude naigo sa walang tuhod ug abaga, si Jumawan naigo sa walang paa, si Arresgado naigo sa walang bahin sa iyang liog ug maoy kritikal ang kahimtang samtang si Mahinay naigo sa tuong bahin sa abaga ug si Pise natapsingan sa iyang lubot.

Ang mga biktima daling gipangdala sa Cebu City Medical Center samtang ang tulo ka mamumuno dali usab nga nakadagan   paingon sa J.M. Basa Street ug dalan T. Padilla.

Ang kapolisan misuway pa og gukod sa mga mamumuno apan pakyas sa ilang hot pursuit operation, nakuha diha sa crime scene ang lima ka kabhang sa kalibre .45 ug usa ka deformed nga bala. Matud pa ni PO1 Julius Regis sa Cebu City Police Office, Homicide Section sa pakighinabi sa Banat News nga ilang pagduda paregla lang ang gibuhat sa tulo ka wala mailhing lalaki. Apan dili sila mobaliwala sa uban pa nga mga posibleng hinungdan sa pagpamusil sa tulo ka wala mailhing lalaki. – BANAT NEWS