Mga papel sa Ombuds i-estrikto

CEBU, Philippines - Andam nga ipatuman ni Deputy Ombudsman for the Visayas Pelagio Apostol ang istriktong polisiya ni Ombudsman Merceditas Gutierrez labot sa pagpanghatag og dokumento sa ilang buhatan.

Sa inteview sa DyRF, si Apostol mipasabot hinuon nga ang ilang bag-ong polisiya ilabina sa pagpagawas og kopya sa Statement of Assets and Liabilities and Net Worth kon SALN wala magpasabot nga dili na sila mohatag og kopya tungod kay usa man kini ka public document.

Matud pa ni Apostol, mas taas ang proseso sa pagkuha sa maong mga dokumento sa mga tawong dunay interes niini apan mipasabot nga dili kini paglisod-lisod sa mga mangayo og papeles o kaha pagtabon sa mga politiko.

Kini tungod kay usa sa ilang responsibilidad mao ang kaprotektahan ang mga elected officials nga dili madabu-dabuhan sa mga tawong may dautang tinguha sa naglingkod nga mga lokal nga opisyales.

Gumikan sa maong polisiya hasta ang mga sakop sa media nga maoy sagad nga nagkinahanglan sa maong mga dokumento gikabalaka sa mga nagkober sa maong beat nga di na unya mapagawas sa publiko ang tinuoray nga bahandi sa mga politiko ilabi na niadtong mga gidudahang nalambigit sa kurapsyon.

Gipaniguro hinuon ni Apostol nga kun ang mga sakop sa media maoy mangayo niini wala gyu'y problema tungod kay sayod na ang Ombudsman nga ang katuyuan sa pagkuha sa maong dokumento mao ang pagpahibawo sa publiko pinaagi sa pagbalita niini.

Apan gitataw ni Apostol nga moagi gihapon sa naandan nilang proseso ang mga tigbalita sama sa pagpirma og sinumpaang pamahayag nga nagtumbok nga maayo ang intention niini sa pagkuha sa maong dokumento.

Kahinumduman nga tungod sa kadali sa pagkuha sa maong dokumento nahibaw-ang dunay mga minilyon dolyares nga mga balay ug yuta sa Estados Unidos ang anak ni Presidente Gloria Macapagal Arroyo nga si Rep. Mikey Arroyo nga dihang gisusi sa mga investigative journalists wala kini maapil sa gideklarar niining SALN. – BANAT NEWS