CEBU, Philippines – Giawhag sa Commission on Election (Comelec) si Kongresista Pablo Garcia sa ikaduhang distrito sa lalawigan sa Sugbu ug mga kaubanan niining magbabalaod nga dalion ang pagsang-at og petisyon sa pagpatuman sa full automation sa umaabot nga eleksyon sunod tuig.
Si Provincial Comelec supervisor Leonel Marco Castillano miluwat niining maong awhag ngadto kang Garcia ug sa mga magbabalaod nga sayuhon ang ilang hulgang pagsang-at og petisyon subay sa pagpatuman sa full-automation sa piniliay sunod tuig.
Matud ni Castillano nga wala sila mabalaka niining maong lakang bisan pa og mopasaka'g kaso o ba kaha kwestyonon sa mga magbabalaod ang legalidad sa bag-ong sistema sa eleksyon sanglit siya mitataw nga katungod man ni bisan kinsa ang pagreklamo.
Apan midugang siya, nga mas maayong masayo ang pagsang-at og petisyon sa maong pagpatuman aron maandam usab nila sa Comelec ang angayan nilang buhaton kun ugaling dili mahinayon ang pagpatuman sa computerized election sa tuig 2010.
“Mas maayo man gud nang sayohon nila, at least ba kun mo-file sila kay para mapadayon namo ang angayang buhaton, kay sa tan-aw nako, I don’t know if I’m right pero kung kana nga mga grounds nga maka qualified ana, pero di ko kaseguro ana kay naa may desisyon ang Korte Suprema ana…pero amo lang na nga ipadali kay para dili sad mi alanganin ang Comelec ba,” sumala pa ni Castillano. - Rey Pasaporte (BANAT NEWS)