Tanang sitio sa ika-4 nga distrito pasug-an

CEBU, Philippines – Gitugyan na ni Kongresista Benhur Salimbangon ngadto sa Cebu Electric Cooperative (Cebeco) II ang P5.6 milyones nga pundo alang sa electrification project sa mga sityo sa ikaupat nga distrito sa lalawigan sa Sugbo.

Si Cebeco II general manager Peter Seneres ang midawat sa tseke niadtong Biyernes sa residensiya sa mga Salimbangon sa Curva, Medellin atol sa kasaulugan sa adlaw'ng natawhan ni Milagros, ang inahan sa kongresista.

Kini gisaksihan nila ni Mayor Ricardo Ramirez sa Medellin, Vice-Mayor Maria Luisa Loot sa Daanbantayan.

Matud pa ni Salimbangon nga ang pundo maoy kabahin sa P30-milyones nga congressional initiative fund sa National Electrification Administration alang sa electrification project sa tibuok distrito.

Ang P20-milyones alang sa Cebeco II ug ang P10-milyones alang sa Bantayan Electric Company (Banelco) alang sa mga lungsod sa isla sa Bantayan nga mao ang Santa Fe, Bantayan, ug Madridejos.

Nunot niini, giawhag ni Salimbangon ang mga opisyal sa kabarangayan nga iduso ang resolusyon ngadto sa Cebeco ug Banelco aron masayran ang mga sityo nga wala pa'y kuryenti. - Gregg M. Rubio (BANAT NEWS)