CEBU, Philippines – Pasidunggan sa kagamhanan sa dakbayan sa Sugbu ang mga senior citizen sa siyudad nga nipatong na sa usa ka gatos ka tuig ang pangidaron nga tawgong Centenary Senior Citizen’s Award, nga ihatag atol sa culminating activity sa kasaulugan sa Senior Citizens’ Month sunod buwan.
Usa ka resolusyon ang ipalabang ni Konsehal Edgardo Labella atol sa umaabot nga sesyon sa City Council nga alang sa maong katuyoan.
“This special group of elderly Filipinos represents the history and legacy of over a century of nationhood, it is apt to recognize them….” tipik sa resolusyon ni Labella.
Usa unya sa makadawat sa Centenary Senior Citizen’s Award mao si Natividad Sanchez-Go sa barangay Mabolo, nga misaulog sa iyang ika-100 nga birthday niadtong Septiyembre 8.
Ang national president sa Federation of Senior Citizens’ Association of the Philippines (Fescap) nga si Labangon barangay captain Felix Abella mihangop sa maong lakang.
“Tagsa ray makaabot og usa ka gatos uy, ang average karon is seventy years old bonus na kanang pangedaruna, so, mas maayong hatagan og award,” sumala ni Abella.
Miingon ang kapitan nga sa kasamtangan, duna nay lima ka mga tiguwang sa dakbayan nga ilang nahibaw-an nga nag-edad og usa ka gatos pataas.
Apan nagtuo si Abella nga duna pay uban nga wala nila masayri hinungdan nga ilang giawhag ang mga anak ug apo niini nga mopahibawo kanila. - Elly Bolonos (BANAT NEWS)