Mga aktibista naghugpong na sab

CEBU, Philippines - Nagkahugpong pagbalik ang tanang mga aktibista dinhi sa Sugbu sa panahon pa sa martial law ni kanhi presidente Ferndinand Marcos human sa deklarasyon ni Senador Benigno “Noynoy” Aquino nga modagan sa pagka-presidente sa umaabot nga presidential election. Sumala pa ni USJ-R College of Law dean, Jonathan Capanas sa interview sa DyRF nga usa siya sa aktibistang tinun-an nga mimartsa aron pakanaugon sa katungdanan si Marcos.

Nalipay siya sa desisyon ni Aquino tungod kay wala lamang damha nagsabot ang mga aktibista kaniadto gipangulohan ni kanhi IBP Cebu City president Atty. Democrito Barcenas nga magpundok og balik aron pagbuhi sa ilang kawsa ug alang sa pagsuporta sa kandidatura ni Aquino.

Kini tungod kay nakakita na sila og laing kapilian nga kandidato sa pagkapresidente nga usa ka pro-life, mahigugmaon sa kagawasnan, kamatuoran ug hustisya apil na ang maayong pangagamhanan.

Si Capanas nagkanayon nga dili ang performance sa pagka-kongresista ug pagka-senador maoy basehanan sa usa ka maayong leader sa nasud tungod kay daghang napiling mayor, kongresista ug pagkasenador nga wala gani igong kasinatian. – BANAT NEWS