Mama sa SK chairman mireklamo

CEBU, Philippines - Ang inahan sa SK chairman sa barangay Apas mihulagway nga "political harassment" ang pagkwestiyon sa opisyal sa barangay sa mga absences sa iyang anak sa senemanang sesyon. Sumala pa ni Theresa Verzosa ang inahan ni Jan Nichol Verzosa nga SK chairman sa barangay Apas dugay nang natubag sa iyang anak ang reklamo ni Barangay Kapitan Ramil Ayuman.

Ang inahan nga Verzosa mihatag sa Banat News sa duha ka pahina nga tubag ni Jan Nichol Verzosa penitsahan Agosto 10, 2009 diin gisaysay niini nga sa session niadtong Mayo 2 ning tuiga mitawag kini sa kapitan nga dili makaapil sa sesyon tungod sa kakapoy sa kalihukan sa Labor Day, sa Hunyo 9 ug 11 naka-file siya og leave of absence ug sa Hulyo 4 ug 8 wala siya makatambong tungod kay giusab ang naandan nga schedule sa sesyon nga itumong sa una ug katapusan nga Lunes sa matag bulan ug uwahi na kaayo siya nahatagan og notisya.

Sa mao usab nga tubag, si Jan Nichol Verzosa mialegar sa kapitan nga gi - "single out" siya tungod kay gawas sa iyang absences, ang iyang P12, 026 nga honorarium sa bulan sa Hulyo gi-hold usab sa barangay treasurer nga si Wilma Sabaldan tungod sa gipagawas sa kapitan nga "advice for disallowance."

Tungod niini, si Jan Nichol mihulga nga pasakaan kini og kasong kriminal, administratiba ug kasong civil kun dili ma-release ang iyang honorarium.

Si Theresa nagkanayon nga ang gihimo sa kapitan usa ka political harassment tungod kay niadtong Agosto 3 ning tuiga gipa-blotter sa barangay ang iyang anak nga nag-inom sa dalan paingun sa Reverine duol sa Aloy Sinangag bisan og nagbarugbarog lamang ang iyang anak. ''Nganong energized man kaayo ang kapitan sa mga absences ni Nichol nga naa may mas dagko pang problema sa barangay wala man atimana, sama sa baha gikan sa Mahayahay paingon sa San Antonio Village, kaso sa dengue, kadaghang mga bata nga madasmgan sa duol sa eskuylahan tungod kay usa ka barangay tanod ang gipabantay, mga fraternity ug drugas sa high school ug sa elementary," asoy pa ni Theresa. "Sukad nga milingkod si Nichol wala gyud na tagai og chance nga makig-work sa iyaha (kapitan Ayuman)," dugang pa niya. Nagtuo si Theresa nga dili si Nichol ang tinud-anay nga giapas sa kapitan kun "kami nga ginikanan" tungod kay nagdumili kini sa pagbotar sa kapitan niadtong nakalabay nga barangay election tungod sa kapin sa P30 mil nga pundo sa Sinulog sa barangay Apas sa tuig 2005 nga wala ma-accounted. – BANAT NEWS