CEBU, Philippines - Luwas ang tanang pasahero ug tripulante sa MV Butuan Bay 1 sa Gothong Shipping Lines human naaberya kagahapon sa kaadlawon sa kadagatan sa Mizamis Occidental dihang nakasugat og trouble ang makina niini.
Ang maong barko dunay 117 ka pasahero ug 52 ka tripulante mibiya sa pantalan sa dakbayan sa Mandaue alas 7 sa miaging gabii paingon sa Ozamis City agi sa Iligan City.
Si Commander Anelito Gabisan ang chief of staff sa Coast Guard district sa Eastern Visayas mibutyag nga napugos sa pag-angkorahe ang mga tripulante alas 3 pasado kagahapon sa kaadlawon nga anaa sa 9.8 nautical miles sa kadagatan sa Plaridel Mizamis Occidental human namatikdang dunay leaking sa makina sa maong barko.
Matud ni Gabisan nga dunay duha ka personnel sa Coast Guard sa Oroquita City ang misaka sa maong barko aron mopahigayon og pakisusi sa kundisyon sa MV Butuan Bay 1.
Nagkanayon si Gabisan atol sa pagkutlo ning balita kagahapon sa hapon nga sila si ship captain Edelberto Leson ug Emmanuel Caballes mipahibawo kanilang mahimo rang maayo ang depekto sa maong barko apan dili siya makasiguro kun kanus-a makadagan og balik.
Hinuon gipasalig ni Cabisan nga luwas ang tanang pasahero ug tripulante sa maong barko ug dili tinuod ang report sa kaulohan nga giingong napadpad ang maong barko. – BANAT NEWS