CEBU, Philippines - Sa ika-43 nga anibersaryo kagahapon sa National Police Commission (NAPOLCOM) ang usa sa ilang gisentrong proyekto mao ang kabahin sa pamilya isip yawe sa hingpit nga kahapsay ug kalinaw matud ni Director Bernardo Calibo sa NAPOLCOM.
Si Calibo mipasabot nga ang usa ka bata kung maayo kining pag-amoma sa iyang pamilya mamahimo niini kinaiya ang pagtinarong, ug kini matud pa niya makita diha palang sa usa ka singko anyos.
Matud ni Calibo nga kung ang pamilya magsentro sa paghatag og training o disiplina ug maayong pag-amoma dako ang posibilidad nga mokunhod ang gidaghanon sa mga kriminal.
Kagahapon sa maong kasaulogan sila si Chief Superintendent Lani O’ Nerez, Regional Director sa Police Regional Office, Superintendent Anthony Obenza, Ariel Lim, Assistant Secretary sa Malacanang ug Cesar Montano ang mitambong.
Ang kalihukan sa programa gisugdan kagahapon sa alas 11:00 sa buntag ug nianang pagkahapon dunay gipahigayong mini-seminar sa Magna Carta for Women. – BANAT NEWS