Namilar og patay naigo sa pamusil didto's Badian

CEBU, Philippines - Nalandig sa tambalanan ang usa ka batan-ong lalaki human kini napagan ug napusilan samtang nagbilar sa namatay nilang silingan didto sa barangay Banhigan, lungsod sa Badian niadtong Martes sa alas 3:40 sa kaadlawon.

Si Bonnie Francis Chavez, 27, ulitawo ug molupyo sa maong lugar gipusil sa silingan nga si Perry Mabuting, hingkod ang panuigon, minyo ug nagpuyo gihapon sa maong dapit.

Matud ni PO3 Emmanuel Caballero sa Badian Police Station sa nahinabi sa Banat News nga samtang ang biktima namilar, miapil kini og duwa sa sugal nga tong-its. Ang suspek nga si Mabuting nakabantay nga kaduwa ni Chavez sa tong-its ang iyang kontra (wala makuhai’g ngalan) hinungdan nga kalit kining namusil gamit ang wala matinong kalibre sa armas. Aksidenting naigo ang biktima nga nagtalikod niadtong higayona.

Paglabay sa pipila ka gutlo, kalit lang mitiyabaw ang biktima sa kasakit sa iyang bukobuko ug didto mahibaw-i nga naigo kini sa maong pagpamusil ug gidali pagdala sa Badian District Hospital ug padayon pa’ng giatiman sa mga doktor.

Ang suspek daling misibat pahilayo apan nianang pagkabuntag nadakpan kini sa kapolisan ug gipriso samtang nagpaabot sa kiha. –BANAT NEWS