CEBU, Philippines - Nagpabiling talandugon ang kahimtang sa usa ka tawo human pusila ang tiyan niini sa iyang higala didto sa eskina sa mga dalan Gorordo Avenue ug Ayala access road sa miaging kaadlawon.
Ang samdan mao si Leonelle Pescadero Manansala alyas Insek, 26, nga taga Camputhaw, samtang ang gitumbok nga suspetsado nailhan nga si John Louie Cui alays Julo, 19, nga silingan ra usab sa biktima. Sa imbestigasyon sa kapolisan nasayran nga ang biktima nalingaw kaayong nakig-inom sa iyang mga higala diha sa usa ka convenience store sa Gorordo.
Apan giingong kalit lang nga mipatim-aw ang suspetsado ug gitagbo kini sa biktima uban sa pag-ingon, “unsa to imo giingon Jul?”
Ang suspetsado nga miatras, milanit sa gitangkil niyang armas de fuego ug dayong pusil sa tiyan sa biktima.
Ang biktima daling gihatod ngadto sa Chong Hua Hospital samtang ang suspetsado mitahan usab dayon sa iyang kaugalingon ngadto kang PO2 Danilo Cabahug sa PNP Crime Laboratory Office -7.
Nagpahayahay na karon sa prisohan ang suspetsado samtang gipaabot ang kiha nga isang-at batok kaniya. - Lesley Caminade (BANAT NEWS)