Abogado gidakop sud sa TG-CCPO

CEBU, Philippines - Usa ka abogadong misuway unta pagpagawas sa iyang kliyente nga gihulagway niyang illegal nga gidakop mao na hinuoy gidakop usab sa mga polis nga midakop sa iyang kliyente sulod sa buhatan sa Traffic Group sa Cebu City Police Office kagahapon.

Ang gidakop mao si Atty. Danilo Pilapil nga mihatud unta og suwat ngadto sa buhatan ni Chief Insp. Andres Bayarcal sa TG aron pabuhian si Harvey Ygot Magale.

Si Magale nakadasmag og usa ka ginganlan og Glenn Abella niadtong Sabado diha sa Busay ug namatay kini. Sumala pa ni Pilapil sa iyang suwat wala mo-hit and run ang iyang kliyente gani mitabang pa kini sa pinansyal nga panginahanglan sa namatay.

Apan dihang miadto kini sa buhatan sa TG pagkabuntag aron ipahibalo ang iyang gihimo sa namatay gidakop kini sa mga polis nga gihulagway ni Pilapil nga illegal sanglit wala gani diha sa aktuwal nga aksidente ang mga arresting officers, di sad hot pursuit operation.

Ang abogado mibahad nga mopasaka og kiha ngadto sa Ombudsman for the Military o ba kaha sa National Police Commission tungod sa gibuhat ngadto sa iyang kliyente.

Gikatahong wala dawata sa mga polis ang demanda sa maong abogado hinungdan nga nasuko ang naulahi ug mibuhi og pulong nga “unsa man ning opisinaha ignorante.”

Diha-diha giposasan sa mga polis si Pilapil sa rason nga nanginterbiner kini sa imbestigasyon ug maisip nga ‘obstruction of justice” kini.

Ang abogado nakaangkon og mga samad, bukol ug pangos atol sa komosyon kay giingong nagkisikisi kini ug gitanggong sa stockade sa CCPO.

Ang abogado mibahad karon nga ikiha sila si Bayarcal ug mga sakop nga mipasipala kaniya.(Guam Logroño) (BANAT NEWS)