Oposisyon mobawos sa BOPK sa 2010 - Guardo

CEBU, Philippines - Giangkon ni opposition leader Jonathan Guardo nga nahurot pagkaparot ang mga kandidato sa oposisyon sa siyudad sa Sugbu sa nangaging mga eleksyon apan masaligon siyang lahi karon ang sitwasyon sa 2010 elections tungod kay dili na makapapili pag-usab ang mga haligi sa Bando Osmeña Pundok Kauswagan (BOPK).

Ang pamahayag ni Guardo maoy reaksyon sa giluwatan ni Mayor Tomas Osmeña, nga ang mga sakop sa oposisyon iyang sinalikway o gisalikway sa mga Sugbuanon.

Kini human usab mogawas ang taho nga mitabok na si Kongresista Antonio Cuenco ngadto sa Kugi Uswag Sugbu (Kusog) nga kusganon usab nga gipanghimakak niini.

Malaumon ang lider sa oposisyon nga sa sunod tuig nga eleksyon, ila na usab ang kusog nga bahakhak sa makabungog nga kadaugan.

“Tinuod na nga in the last several elections medyo dehado mi pero basin makapanimawos mi sa umaabot nga 2010 elections, amo na ang last laugh,” sumala ni Guardo.

Butang nga dili usab ikatugot sa BOPK nga mahitabo hinungdan nga kini padayong nihan-ay sa mga proyekto nga gisaad niini ngadto sa kabarangayan sa dakbayan.

Una nang gipahibawo sa pangulo sa BOPK nga si Osmeña, nga ang City government mopabaha og mga grasya sa nagkadaiyang barangay sama sa mga dugang honorarium sa mga barangay workers lakip na sa kapin sa usa ka libo ka mga barangay tanod.

Sa pikas bahin gibutyag ni Guardo nga padayon nilang gipangulitawhan si Cuenco nga mutando na sa ilang pagdapit niini ug tinguha sa oposisyon nga ang kongresista sa habagatang distrito sa siyudad maoy himuon nilang kandidato pagka-mayor sa 2010 elections.

Gipadayag ni Guardo nga mahimong kuhaon nila si Cuenco isip guest candidate ug wala na kinahanglana nga kini mutabok pa sa oposisyon.

“Congressman Cuenco doesn’t need to jump to the opposition, he can run as guest candidate naa ra na niya, but the key thing here is for him to run as the standard bearer of the opposition,” dugang pamahayag ni Guardo. (BANAT NEWS)