CEBU, Philippines - Gihimakak ni Talisay City Administrator Richel Bacaltos ang pasangil sa usa ka negosyante og baboy nga tikasan ang timbangan diha sa ihawan sa siyudad.
Si Bacaltos nga nahinabi sa Banat News kagahapon nagkanayon nga ang timbangan sa ihawan kanunay kining gi-calibrate sa Department of Science and Technology.
Ang National Meat Inspection Service (NMIS) usa sa mga ahensyang mihimo og inspeksyon ug naapil niini ang mga timbangan aron mahatagan kini og accreditation.
Matud usab ni Bacaltos nga kung duna pay deperensiya sa ihawan o ba kaha sa timbangan dili unta mapiling national finalist isip “Best Slaughter House,” ang Talisay Abattoir.
Hinuon iyahang giawhag ang mga hingtungdan nga muadto sa iyang buhatan ug moduso og pormal nga reklamo.
Kahinumduman nga si Allan Alcuiza mipasangil nga ang timbangan sa ihawan sa siyudad tikasan dihang ilang giusab og timbang ang baboy nga gitimbang na sa ihawan.
Human madiskubrehing dako kaayo og deperensya daling midangop sa kapolisan si Alcuiza ug mibahad nga mopasaka og kaso batok sa tagdumala sa ihawan.
Sumala pa ni Alcuiza nga alkanse ang mamaligyaay og buhing hayop sa maong ihawan kay di husto ang timbangan. – BANAT NEWS