CEBU, Philippines - Giprangkahan na ni Cebu City Vice Mayor Michael Rama ang mga barangay kapitan nga kaalyado sa Bando Osmeña Pundok Kauswagan (BOPK) atol sa gipahigayong ABC General Assembly niadtong miaging adlaw.
Partikular nga gipadangat sa bise mayor ang iyang mensahe ngadto sa mga barangay kapitan nga gikatahong wala makauyon sa iyang estilo ilabi na niadtong mga kaalyado sa BOPK nga mipirma sa manifesto nga nag-endorso og laing kandidato pagkamayor sa siyudad sa 2010 elections.
Kahinumduman nga si Rama makapila na ituboy ni Mayor Tomas Osmeña nga maoy kandidato sa ilang grupo pagkamayor sa piniliay sunod tuig.
Dili gusto si Rama nga siya pasagdan lang sa mga tigpaluyo sa BOPK ilabi na sa pag-abot sa campaign period isip standard bearer sa ilang partido.
“Padulong na man gyud ta sa bugnong lugaynon, kauban gani ka kinahanglang barugay gyud kay ang atong kaatbang dili man mahimo nga magsige lang sila og panira unya kita maawahi sa estorya, mao nang klaruhay, atubangay, depensahay,” sumala ni Rama.
Sa pikas bahin, gikonsulta usab sa bise mayor ang mga barangay kapitan atol sa nahisgutang tigom labot sa mga problema niini sa ilang tagsa-tagsa ka dapit ug gipaabot usab nila ang ilang mga gustong angayang buhaton ni Rama.
“I’m very much aware sa mga things nga alegrahunon unya unsay direksyon for tomorrow, continue lang ta sa atong serbisyo,” dugang pamahayag ni Rama.
Nanghinaot ang bise mayor nga wala nay problema nga masugatan sa iyang tinguha pagpapili pagkamayor sa dakbayan sa umaabot nga piniliay.
Uban kang Rama nga magpapili ubos sa BOPK mao si City Hall Education Consultant Joy Augustus Young alang sa pagka-bise mayor. – BANAT NEWS