CEBU, Philippines - Tungod sa walay puas nga pagbasol sa buhatan ni Gobernador Gwendolyn Garcia kalabot sa tanang mga kasaypanan sa kontrobersiyal nga pagpalit sa Kapitolyo sa 25 ka ektaryang lote sa pamilyang Balili didto sa lungsod sa Naga, sa katapusan mituaw na si provincial board member Juan Bolo. Sa interview sa DyRF, si Bolo mipadayag sa iyang dakong pagmahay ug pagtuaw tungod kay siya man ang gipatrabaho alang sa dali nga pagpalit sa maong lote didto sa Tinaan, Naga apan dihang nagkagubot na, siya na ang gihan-ukan sa tanang pagbasol.
"Kita pay gipatrabaho, kita pay gibasol ug gidaut. Wala man unta tay nahimong dautan, iduot pa ta nga nagtrabaho lang ta," matud pa ni Bolo kinsa mitumbok nga si Gobernadora Garcia maoy nagsugo kaniya sa pagpahuman sa maong transaction.
Sa alegasyon nga gipamugos niini ang pagpapirma sa Memorandum of Agreement butang nga gihimakak ni Bolo.
“Kinsa man goy makapugos sa pagpapirma sa gobernador? Board member ra ko? Mataha man gani tang mosulod sa iyang opisina. Boluntaryo tong gipirmahan,” matud ni Bolo nga mipagawas na sa iyang kapungot ug kahiubos.
Samtang si bokal Ian Zambo sa tersiro distrito nagkanayon nga malangay ang ilang gipahigayon nga imbestigasyon kalabot sa maong isyu tungod sa deklarasyon ni Presidente Gloria Macapagal Arroyo nga non-working holiday sa Septiyembre 7 ug 21. – BANAT NEWS