Timbangan sa ihawan sa Talisay may 'tikas'

CEBU, Philippines - Negosyante og karneng baboy mireklamong dili ensakto ang timbangan sa ihawan sa dakbayan sa Talisay dihang ilang nasuta nga ang gitimbang sa maong ihawan di parehas sa ilang pagtimbang sa ilang timbangan niadtong Biyernes sa gabii.

Si Allan Alcuirez, residente sa barangay Bulacao, dakbayan sa Talisay uban sa iyang pamilya dala ang usa ka tibuok karneng baboy mianha sa Talisay City Police Station ug mipa-blotter sa iyang reklamo.

Si Alcuirez sa pakighinabi niini sa Banat News mibutyag nga ang iyang manghod nagsugod pa lang sa iyang negosyo sa pagpangrasyon og karneng baboy ug ang 10 ka binuhi niining baboy gipaihaw niini diha sa ihawan.

Tungod sa pagdudang dili sakto ang timbangan ilahang gipangutana ang mga mangingihaw apan gikatahong gilalis hinuon sila niini maong nagpasumangil nalang silang ilang dad-on ang usa ka tibuok baboy kay ilang himuong kunsumo.

Tuod man dihang gihatagan sila og permit ug nadala sa ilahang balay ilaha kining giusab sa pagtimbang sa ilaha ug diha nila madiskubriheng ang 34 kilos nga gitimbang nga karne gamit ang digital weighing scale sa ihawan migawas nga 42.6 kilos sa ilang kaugalingong timbangan nga “clock design.”

Kini nagpasabot nga ang mamaligya og buhing baboy nga ipaihaw sa maong ihawan maalkanse gyud tungod kay dunay pipila ka kilong di maapil sa pagbayad sa mga kumprador.

Wala pa usab hinuon masuta kun may deperensya ang timbangan sa maong ihawan o ba kaha kung asang timbangan kanila ang may depekto.

Sa maong insidente si Alcuirez mibahad nga mopasaka og kaso batok sa tagdumala sa ihawan sa siyudad.

Si Talisay City Veterinarian Galileo Larawan nga mao usab ang nagdumala sa ihawan gitawgan sa Banat News aron makuhaan og pamahayag apan wala kini motubag sa tawag.

Sa laing bahin, si Konsehal Aaron Capala, chairman sa komitiba sa ihawan sa dakbayan sa pakighinabi niini sa Banat News kagahapon nagkanayon nga wala pa sila makadawat sa maong reklamo apan misaad nga mohimo og pakisusi niini.   (BANAT NEWS)