Chiong nasagmuyo sa desisyon sa DOJ

CEBU, Philippines - Walay kabutangan ang gibating kasubo sa national vice president sa Crusade Against Violence (CAV) nga si Thelma Chiong human masayod nga nitugot na ang Department of Justice (DOJ) sa pagbalhin kang Paco Larrañaga ngadto sa Espanya.

Si Larrañaga maoy usa sa pito nga nakonbikto sa paglugos ug pagpatay sa mga anak ni Thelma nga sila si Jacqueline ug Marijoy Chiong niadtong 1997.

Ang national vice president sa CAV nga maoy inahan sa mga biktima dili makatuo sa gipahibawong kalamboan ni Justice Secretary Agnes Devinadera.

Alang sa inahan sa Chiong sisters, gilaktod sa DOJ ang proseso sa paghatag niini og pagtugot kang Paco nga mabalhin ngadto sa prisuhan sa Espanya.

Pabiling nagtoo si Thelma nga ang senate president o ang presidente lang sa nasod maoy dunay katungod paghatag og pagtugot sa transfer sa maong binilanggo.

Una nang gipadayag ni Thelma ang iyang kadismaya ug nihulagway sa administrasyong Arroyo nga criminal-friendly tungod sa pagbuhi niini sa pipila ka konbiktadong kriminal.

Taliwa sa iyang kadismaya nagplano gihapon si Thelma pagpadala og suwat ngadto kang Presidente Gloria Macapagal Arroyo nga mag-apelar sa desisyon sa DOJ.

Gitataw sa dismayadong inahan sa Chiong sisters nga dili angayang adto sa nasod sa Espanya bilangguon si Larrañaga tungod kay kini dinhi sa nasod nakahimo og krimen.

Nagduda si Thelma nga mabuhian ra ug mamahimong gawasnon pag-usab ang konbiktadong rapist kung kini mabalhin ngadto sa nahisgutang nasod.

Malaumon si Thelma nga paminawon sa presidente ang iyang ipadangat nga sentimiyento ug balihon niini ang nakab-ot nga desisyon sa DOJ.

Nidugang hinoon ang national vice president sa CAV nga kung ibasura ang iyang suwat-hangyo, iya na lang ihangad ngadto sa kahitas-an ang tanan.

Ang mga abogado ni Larrañaga maoy miduso og application ngadto sa DOJ labot sa pag-transfer sa ilang kliyente ngadto na sa nasod sa amahan niini. Kini maoy gibasihan sa pag-evaluate sa Justice department pinasubay usab sa RP-Spain Transfer of Sentenced Persons Agreement (RP-Spain TSPA).

Apan nagtuo si Thelma nga gigamit ang kwarta ug impluwensya sa mga Larrañaga nga kaliwat usab sa mga Osmeña dinhi sa Sugbu, aron maaprubahan ang hangyo niini sa DOJ. (Elly Bolonos)   (BANAT NEWS)