Staff Sgt. Mendez dili 'dagmalan' - asawa

CEBU, Philippines - Gihulagway sa kapikas sa gipatay nga sundalong si Staff Sgt. Romeo Cahanap Mendez nga usa ka maayong tawo ang iyang bana sukwahi sa mga pamasangil sa mga kaubanan niini ug sa sundalong mipatay niini.

Si Jane Mendez, asawa ni Staff Sgt. Mendez dihang nahinabi kagahapon sa mga tigbalita nagkanayon nga bugal-bugalon apan dili makahibalong manapat ang iyang bana.

Dugang pa ni Mendez nga dili siya motuong makaako og panumbag ang iyang bana sa mga kauban kung mamukaw tungod kay sa iyang pag-ila niini sulod sa 15 ka tuig wala pa gyud kini makapanapat kaniya.

“Dili ko motuong sumbag-sumbagon sila, ila ra na nga mga panaot,” pasabot pa sa kapikas ni SSgt. Mendez.

Samtang emosyonal kaayong gimahayan sa kapikas sa sundalo ang gihimo sa suspek nga si Corporal Jesusito Gonzales Bayang kun nganong kinahanglang patyon pa gyud ang iyang bana.

Matud pa niya nga mahimo raman untang tiilon ug di patyon pagpusil ang iyang bana kung duna gyud kini kalagot, sumala pa niyang ang iyang bana lamang ang gisaligan sa iyang pamilya.

Si SSgt. Mendez dunay lima ka mga anak ug nagpaabot pa sila sa ikaunom nilang anak sa katapusan niining bulana.

Samtang si Major Wilson Ferria, tigpamaba sa Central Command nagkanayon nga wala hinuoy angayang kabalak-an ang pamilya ni Staff Sgt. Mendez tungod kay aduna man kini madawat nga mga benefits gikan sa Philippine Army.

Gikatakdang ipauli sa ilang lugar sa Ubay, Bohol si Staff Sgt. Mendez karong sunod semana.

Si Mendez gipusil patay sa kaubang si Bayang gumikan sa kasuko sa naulahi sa pamaagi niini pagpukaw kaniya ug sa kanunay niining pagbugal-bugal panahon nga kini mamukaw kanilang mga sundalo inig sayo sa buntag. (Lesley Caminade)    (BANAT NEWS)