CEBU, Philippines - Mga residente sa barangay Poblacion, lungsod sa Sibonga ang gibati og kabalaka nga mangasunog tungod sa giingong pagpundo og mga krudo ug uban pang mga kemikal sa usa ka panimalay nga dunay ipahigayong welding sa mga mini buses.
Ang maong mga residente mipadangat sa mao nilang reklamo ngadto sa buhatan ni Mayor Lionel Bacaltos ug dinhi sa Banat News.
Ang nahisgutang residente mipasangil sa usa ka mini-buses operator diha sa Leonilo Mercado Street, Poblacion nga nagpundo og mga binarel nga krudong igtutobil sa ilang nga mini buses.
Apan ang gikahadlokan sa maong residente mao ang pagpang-welding sa mga mekaniko diha sa maong mga sakyanan nga posible unyang moresulta sa aksidente ug mangasunog ang ilang lugar.
Ang maong dapit gikatahong dili commercial o industrial area kundili residential nga duol sa simbahan ug tunghaan.
Nanghinaot ang mga concerned residents nga ipahunong na sa mga opisyales sa lungsod ang maong kalihukan sa usa ka residential area gumikan sa peligro. Si Gilmore Saniel, municipal administrator sa lungsod sa pakighinabi sa Banat News kagahapon nagkanayon nga duha ka semana na ang milabay gipatawag si Baynos sa mayor human madawat ang maong reklamo sa mga silingan niini.
Gibutyag ni Saniel nga si Baynos nanag-iya og tulo ka mini bus nga magbiyahi-an gikan sa Sibonga paingon sa Sugbo. Si Baynos ang gipahimangnoan sa mayor nga ipahunong ang mao niyang kalihukan aron paglikay sa disgrasya.
Si Saniel midugang nga mopahigayon sila og follow-up nga pakisusi sa sunod semana kabahin sa maong reklamo aron masuta kung wala na ba mobalik si Baynos sa operasyon niini nga pagpamundo og mga krudo ug pagpahigayon og welding. - Brenda Batuto (BANAT NEWS)