Sundalo gitipi sa baldadong kauban

CEBU, Philippines - Patay diha-diha ang usa ka miyembro sa Philippine Army human kini giunay og pusil sa kaubang sundalo nga giingong nasuko sa paagi niini pagpukaw pasado alas-singko sa buntag kagahapon sa kan-anan sa 7th Finance Service Unit, Camp Lapu-lapu sa barangay Apas.

Patay na si Staff Sgt. Romeo Cahanap Mendez, 42, molupyo sa barangay Camambugan, Ubay, Bohol nga maoy Supply Sergeant sa maong unit human pusila ni Corporal Jesusito Gonzales Bayang, 32, molupyo sa barangay Tuburan, Del Carmen, Surigao del Sur.

Naabtan pa sa Crime Scene Investigation Unit ug Homicide Section ang patay’ng lawas sa biktima nga naghayang nga ang katunga sa lawas nga wala nay sinina nasablay ibabaw sa plastic nga bangko.

Matud pa ni Major Wilson Feria, tigpamaba sa Central Command nga iyang gika-istorya ang opisyal nila ni Bayang nga si Col. Melchor Tuliao nga mibutyag nga wala sila’y namatikdang panagbingkil sa duha gani nagdungan pa kini og pangaon sa milabay’ng gabii.

Si Col. Tuliao mibutyag sa kapolisan nga iyang nakatagbo ang suspetsado nga nagbitbit og kalibre.45 niadtong tungura ug dangtan pila ka gutlo nakadungog siya og banha nga tawo sa sulod ug gisundan kini og sunod nga buto sa armas.

Dihang iyang gisusi sa gawas, iyahang natagbuan si Bayang pag-usab nga nagbitbit gihapon sa armas maong iyaha kining gipangutana.

 “Anong nangyari, anong putok ‘yun?”matud pang Tuliao. Giingong gitubag siya sa suspek og “Hindi ko na matiis sir.”

Ang suspek milakaw padulong sa Centcom office maong iyahang giadto ang dapit ug usa ka sundalo usab nga si Mark Anthony Lumapas mao nay mipahibalo niyang gipusil ni Bayang si Mendez.

Si Tuliao midali pagtawag sa MP nga babagan si Bayang apan nasuta niyang mitahan na diay kini.

Si Lumapas mibutyag nga naglalis ang duha human pukawa sa biktima ang suspek, ug tungod sa pagpahimangno sa suspek sa biktima nga nakahibalo siya sa oras tingmata.

Apan gikatahong nagkatinubagay hinuon ang duha ug ang biktima mitubag og “bata paka” hinungdan nga milakaw ang suspek ug misulod sa iyang gikatulgan dayong kuha og armas ug gibalikan ang biktima ug gipusil kini.

Hinuon si Corporal Bayang, boluntaryong mitahan sa mga Military Police human sa krimen ug mi-turnover sa iyang armas nga gigamit sa pagpusil kang Mendez.

Samtang giklaro ni Feria nga ang pamilya sa namatay makadawat sa tanang mga benipisyo sa burial, funeral expenses, ingon man insurance, ug uban pang mga benepisyo.

Pugngan usab nila ang sweldo sa suspetsado samtang nagpadayon pa ang imbestigasyon sa kasong administratiba ug kriminal.

Ang akusado nga si Bayang nga miatubang sa mga sakop sa media mipadayag nga nagmahay siyang iyang napatay ang kauban apan iyaha nalang dawaton tungod kay nahitabo naman ang tanan.

“Naa gyu’y pagmahay apan naniguro nalang ko kay baldado gud ko unya siya magsige’g balik-balik og sulti nga mopatay gyud siya’g tawo. Akong gipusil tungod kay dili man sab ko magsilbi’g sinukmagay kay dako man siya,” sumala pa ni Bayang.

Gipadayag niini nga naputong na siya ug wala na maka-agwanta sa dili maayong pamatasan sa biktima tungod kay dunay panahon nga dukdukon niini ang iyang baldadong tiil o tuhod kun mamukaw ug ang kanunay’ng pagpanghagad niini og duwelo.

Nasayran nga ang biktima sayo kaayong mipukaw sa suspetsado aron sa ilang pagpanghinlo sa palibot, apan giingong gibira sa biktima ang beddings niini ug giuyog-uyog.

Ang biktima naka-angkon kini’g pito ka mga samad pinusilan sa liog ug habig sa walang bahin sa lawas.

Lima ka mga kabhang sa .45 ang nakuha sa kapulisan sa crime scene ingon man duha ka buhing bala niini, usa ka magazine, ug usa ka Colt. caliber .45 pistol. - Uban sa report ni Lesley Caminade (BANAT NEWS)