CEBU, Philippines - Gihulagway sa Comelec sa dakbayan sa Sugbu nga lisod nang malugwayan ang gitakdang deadline pagpahigayon sa continuing registration.
Kini tungod kay giingong daghan ang pangandaman sa Comelec subay usab sa pagpatuman na sa poll automation sunod tuig.
Ang Kabataan party-list maoy nangusog nga mairog ang continuing registration gikan sa Oktobre 15 nga deadline ngadto na sa Disyembre 15.
Kini pinaagi usab sa giduso nga House Resolution number 1162 ni Kongresista Raymond Palatino nga alang sa maong katuyoan.
Buot ni Palatino nga mahatagan og taas nga higayon ang mga tawo nga marehistro ilabi na ang gitawag og mga first time voter.
Nagtoo ang nahisgutang kongresista nga imposibli nga marehistro ang labing minos tres milyones nga first time voter hangtud sa gihatag nga deadline sa Comelec.
Kini tungod kay giingong 200 lang ka mga tawo ang ma-accommodate sa Comelec matag adlaw diha sa nagkadaiyang mga buhatan niini.
Apan nagtoo si City Election Officer for the North District Attorney Marchel Sarno nga maapiki ang preparasyon sa Comelec kung mairog ang registration.
Tambag ni Sarno ngadto sa wala pa makaparehistro nga dili na magpaabot sa deadline aron dili masugamak sa bagang duot sa katawhan atol sa katapusang adlaw sa registration. - Elly Bolonos (BANAT NEWS)