Duna pay laing CITOM T. enforcers nga gipanid-ang mangilkilay - NBI

CEBU, Philippines - Laing mga sakop sa Cebu City Integrated Traffic Operations and Management (Citom) ang gipanid-an karon sa National Bureau of Investigation (NBI-7).

Kini maoy gibutyag ni Citom executive director Arnel Tancinco, human pahibaw-a sa NBI-7 subay usab sa mga reklamo nga nadawat niini.

Nag-una sa mga reklamo nga giingong nadawat sa NBI-7 mao ang pagpangilkil sa mga traffic enforcer ngadto sa mga traffic violators sa siyudad.

Labing minos napulo ka mga traffic enforcer ang giingon ni Tancinco nga padayong gipanid-an sa NBI-7 basi usab sa gisulti niini kaniya. Subay niini subling gipahimangnoan sa Citom executive director ang iyang mga sakop nga magmatngon sa ilang trabaho ug dili magpabadlong.

“Gi-remind gyud sila kay gipahibawo man mi sa NBI nga duna pay daghan mga enforcer nga gi-complain sa ilang opisina nga gi-casing nila,” sumala ni Tancinco. Gipadayag sa Citom executive director nga regular nilang gipahinumduman ang mga traffic enforcer nga likayan ang pagpangilkil sa ilang mga dinakpan.

Katapusang traffic enforcer sa dakbayan nga gidakop sa NBI-7 mao ang usa ka Christian Catoto nga molupyo sa barangay Labangon.

Kini human ireklamo sa usa Jessie Rica nga nangilkil kaniya og P3 mil bugti sa pag-uli sa driver’s license niini dihang nasikop sa usa ka traffic violation. Nasayran nga si Catoto nag-atubang na og kasong kriminal ug administratiba human usab ipasaka sa NBI-7 ang mga kaso batok niini.

Gibutyag ni Tancinco nga si Catoto dunay giatubang usab nga mga administrative charges diha sa ilang buhatan nga wala niini tubaga.

Wala pa matino kung hingpit na ba nga gitaktak sa serbisyo ang nahisgutang traffic enforcer subay usab sa ubay-ubay nga mga reklamo nga iyang giatubang. - Elly Bolonos (BANAT NEWS)