Public hearing sa P750 pletihan ipahigayon sa LTFRB-7 karon

CEBU, Philippines - Nanawagan ang direktor sa Land Transportation Franchising and Regulatory Board (LTFRB-7) sa publiko pagtambong sa ipahigayong public hearing karung buntag alang sa gidemanda sa transport group nga dugang pisong usbaw sa pletihan sa pampublikong sakyanan epekto ning padayung pagsaka sa presyo sa lana.

Gipasalig ni direktor Romulo Bernardez nga hatagan og higayun nga makapalanog ug paminawon ang mga demanda ug yangongo nga ipasupot unya ngadto ni bisan kinsa nga motambung sa maong public hearing.

Hinuon gipadayag sa direktor nga sukad kagahapon kompirmado nang motambong ang lain laing kahugpungan sa mga tinun-an sa lain laing tunghaan dinhi sa Sugbu, mga senior citizen ingon man si Atty. Emmanuel Iway ang nagrepresentar sa mga sumasakay.

Matud ni Bernardez nga apil sa ilang gipadad-an og imbitasyon sa maong public hearing mao ang office of the solicitor general pinaagi ni Provincial Prosecutor Jane Petralba.

Samtang sa habig sa transport group nga nagsilbing petitioner ug midemanda pagpangayo og dugang usbaw sa pletihan motambung sab ang Citrasco ingon man ang Vudtrasco samtang dili motambong ang Nagkahiusang Drayber sa Sugbo (NADSU) tungod kay nanawagan kini og uniformity sa minimum nga pletihan sa Manila ug dinhi sa Sugbo.

Matud ni Bernardez ang resulta sa maong public hearing nga sugdan alas 9:00 karung buntag diha sa LTFRB-7 iduso nila sa ulohang buhatan sa LTFRB board ug mao na kini ang motimbang timbang kun angay nabang usbawan ang minimum nga plitihan.

Pagkakarun 6.50 lang ang minimum nga pletihan dinhi sa Sugbo apan kun ka aprobahan ang maong petisyon mobalik kini og saka sa P7.50. - Darrel Carumba (BANAT NEWS)