Kapitolyo, naga gipadalhan notisya tungod sa coal ash

CEBU, Philippines - Gipahibalo ni   Atty. Benjamin Cabrido nga ila nang gipadad-an og notice to sue ang mga opisyales sa lalawigan sa Sugbo ug sa lungsod sa Naga niadtong miaging semana tungod sa pagsugod na sa Kapitolyo sa pagtambak og coal ash sa lote sa barangay Tinaan lungsod sa Naga.

Matud pa ni Cabrido nga sigon sa ilang pag-interview sa molupyo sa Tinaan nagsugod sa pagtambak ang Kapitolyo sa maong coal ash gikan sa Korean Electric Power Corp. kon KEPCO nga gitawag sa mga residente nga carbon niadtong bulan sa Mayo ug Hunyo hinungdan nga nagkasakit sila.

Si Cabrido miingon nga wala nila gipahibawo ang mga sakop sa media sa ilang paghatag og notice to sue tungod kay ilang gihatagan og 30 ka adlaw si Governor Gwendolyn Garcia ug ubang mga opisyal sa lalawigan sa pag-resend sa gipirmahan Memorandum of Agreement kun MOA tali sa Kapitolyo ug sa KEPCO.

Sa higayon nga magdumili sa pagpaminaw sa ilang pasidaan, si Cabrido mibahad nga ilang ipasaka ang kasong kriminal, administratiba ug kasong civil batok sa maong mga opisyal.

Samtang misaad gyud si Cabrido nga babagan nila ang tinguha sa gobernadora nga ipadayon ang proyekto sa Balili property aron maprotektahan nila ang ecosystem sa lungsod sa Naga.

Matud pa niini nga dili na masayon sa gobernadora paghimo og pantalan sa maong lugar tungod kay ang fishery code ug ingon man PD705 nga nagprotektar sa kalikopan maoy malapas niini.

Sa iyang bahin, si Naga Mayor Valdemar Chiong mipadayag nga andam siyang makigtagbo sa mga environmental lawyers aron sabutan kun unsay mas haum nga lakang nga pagahimuon nila.

Samtang si Assistant Ombudsman Virginia Palanca Santiago mitin-aw ngadto sa mga environmental lawyers nga dili usab dali-dalion ang maong kaso tungod kay nagsugod na og imbestigar ang ilang buhatan ug posibleng magsapaw ang ilang mga kaso.

Hinuon sa dihang giadto sa Ombudsman ang dapit uban sa media, nadiskubrehan nilang tinuod ang maong report nga gisugdan na og tambak og coal ash ang dapit.

Si Atty. Antonio Oposa nagkanayon nga hasta ang barangay officials ug ang Kapitolyo manubag niini.

Tungod niini, si Santiago makigtigum sa mga environmental lawyers ug sa mga hingtungdan sa maong isyu. - BANAT NEWS