Magtutudlo supak sa hukom sa Malacañang

CEBU, Philippines - Ang mga magtutudlo ug mga tinun-an sa Mandaue City College sa Jagobiao campus nga gidumala sa presidente niini nga si Dr. Paulus Marie Cañete naglaraw nga mopadangat sa ilang manipesto nga magpadayag sa ilang paghangop sa gipakanaug nga hukom sa kagamhanan ug pagsupak sa pag-reprimand lamang ang gisilot sa Malakanyang kang Mayor Jonas Cortes. Matud pa ni Dr. Elmer Repalda, tigpamaba sa maong tulunghaan sa pakighinabi sa Banat News nga misuporta sila sa gipakanaug nga hukom ni Kalihim Ronaldo Puno sa Department of Interior and Local Government (DILG) nga dili igo nga kasaba lamang maoy isilot kang Cortes tungod sa kadako sa sala nga nahimo niini ngadto sa taga Mandaue.

Gipasabot niya nga wala na hinuon nila paabota nga ipadayon ang nahaunang hukom sa DILG nga pagsuspenso kang Cortes sulod sa usa ka tuig ug unom ka bulan.

Gitataw niya nga igo na kaayo nga makapadangat sila sa maong manipesto nga nagpadayag og pagsupak sa maong hukom isip mensahe ngadto sa kadagkoan sa Malakanyang nga ang maong hukom wala makahatag og katagbawan sa katawhan.

Subay sa gisang-at nga reklamo sa mayoriyang sakop sa konseho ngadto sa Malakanyang nga si Mayor Cortes nakahimo'g kalapasan nga grave misconduct in office, oppression and abuse of authority ug uban pa.

Hinuon si Special Project Consultant Edmund Sanchez dihang nahinabi sa mga tigbalita mipadayag sa iyang pagtuo nga gisambogan sa politika ang gipakanaug nga hukom sa DILG.

Gipasabot niya nga kaalyado ni 6th District Representative Nerissa Soon-Ruiz ang misang-at og reklamo ngadto sa DILG batok kang Cortes. – BANAT NEWS