CEBU, Philippines - Gikalipay sa mga kadagkuan sa kapulisan sa dakbayan sa Sugbu ang pagkunhod og 32 porsento sa mga krimen nga nahitabo diha sa dalan Colon sukad ilusad ang Task Force Colon (TFC) niadtong Hulyo hangtud sa katapusan sa Agosto ning tuiga.
Matud pa ni Sr. Supt. Patrocinio Comendador, ang direktor sa kapulisan sa dakbayan sa Sugbu nga nagpakita kini kun unsa ka epektibo ang TFC batok sa mga dautang elemento.
Sumala pa ni Comendador nga dako kaayo og epekto ang pagkatag-katag sa TFC ang mga krimen sa nahisgutang lugar sama sa kawat, snatching, tempo ug uban pa mikibra gikan sa July 27 hangtud sa Agosto 27 ning tuiga.
Gipadayag niya nga ang ubang mga krimen diha sa Colon ilabi na diha sa V. Gullas, ug ubang mga eskinita dako kaayong problema sa kapulisan sulod sa pipila na ka tuig nga milabay.
Apan gumikan sa mga Field Training Police (FTP) nga mi-abag sa mga organic police nga idestino diha sa Colon area sulod sa 24 oras, dili na makahuygo ang mga kriminal sa paghimo sa ilang mga binuang. - Guam P. Logroño (BANAT NEWS)