CEBU, Philippines - Mokabat sa 40 ka mga kawani sa Parol Probation and Administration (PPA) ang giseminar sa Dangerous Drugs Board (DDB) bahin sa mga paagi pagduso sa mga tawong mabuang sa ginadiling drugas ngadto sa mga rehabilitation center aron kini maulian sa maayong buot.
Si DDB Undersecretary Atty. Clarence Paul Ominal nga gikahinabi sa Banat News mibutyag nga ang DDB maoy nagpasiugda sa maong Life Skills Enhancement Training sugod kagahapon ug matapos usab ugma Biyernes diha sa Crown Regency sa barangay Guadalupe ning dakbayan sa Sugbo. Sumala pa ni Oaminal nga gitinguha sa mga sakop sa DDB sa tibuok nasud nga itudlo sa PPA kun unsaon pagtabang kadtong mga tawo nga nabuang na sa ginadiling drugas aron kini masulod sa rehabilitation center.
Kasagaran sa mga gipa-ubos sa maong training nagagikan sa Rehiyon 6-7-8 isip kabahin sa programa sa DDB.
Samtang karong adlawa ila usab nga buksan ang seminar sa mga paagi aron mahimong akreditado sa DDB ang tanang mga sakop sa PPA sa Visayas ug Mindanao ug kahatagan og otorisasyon nga maka-representar sa DDB ngadto na sa korte sa bisan asang lugar sa nasud sa pagduso sa petition alang sa voluntary confinement sa mga drug dependent.
Ang dinapit karong Biyernes sa pagtak-op ning maong kalihokan mao ang chairman sa DDB nga si kanhi Senador Vicente “Tito” Sotto III. – BANAT NEWS