CEBU, Philippines - Nagtinguha si opposition leader Jonathan “Atan” Guardo pinaagi sa iyang kampanya batok sa sakit nga dengue ang “zero casualty” sulod sa tulo ka tuig.
Si Guardo sa pakighinabi sa mga tigbalita kagahapon nagkanayon nga bisan pa man migamay ang gidaghanon sa mga namatay sa maong sakit niining tuiga komparar sa mga nangaging katuigan, mas maayo gyung hingpit nga wala nay mamatay gumikan niini.
Matud pang Guardo nga mapugngan lang ang maong sakit pinaagi sa prevention ug pagpakabana sa komunidad, base usab sa mga kasayurang iyang nakuha gikan sa Department of Health.
Karong Biyernes ning semanaha, pormal nang ipagawas sa mga local television networks ang 'infomercial' ni Guardo kabahin sa maong sakit diin usa ka inahang namatyan og 12-anyos nga anak maoy mopahibalo sa publiko sa nahitabo.
Matud pang Guardo pinaagi niining iyang tampo kontra dengue nanghinaot siyang makatabang bisan man lang pagpamenus sa mga nataptan sa maong sakit ug midugang nga bisan niining puntoha magtinabangay sila sa dakbayan sa maong tinguha.
“Mas maayo unta nga magtinabangay ta batok sa dengue, at least, magkahiusa mi. Ang dengue walay gipili maadunahan ka man o ma-pobre. Mao ni ang atong gustong ipakita sa publiko nga importante ang awareness,” matud pang Guardo.
Ang dakbayan sa Sugbu milusad na og sunod-sunod nga kampanya batok sa maong sakit pinaagi sa information drive sa mga barangay. Si Guardo nga usa ka pribadong tawo milusad na usab og kaugalingong information drive batok sa maong sakit sa mga sitio sa dakbayan pinaagi sa “Guard Against Dengue Spread.”
Sa maong infomercial ni Guardo nga molanat og 30 segundos si ginang Celestina Labrador nga taga sitio Kaduloy, barangay Tisa ning dakbayan mitug-an sa mga tigbalita nga gidala pa niya ang iyang anak sa usa ka klinika sa Talisay City.
Ang iyang anak nga 12-anyos nga lalaki nga usa ka soccer player gihulagway niyang lagsik pa kaayo sa dihang gidala sa maong klinika apan dangtan og tulo ka adlaw kalit kining naluya, dili na mokaon ug moinom maong girekomendar na kini sa mananambal sa maong klinika nga dad-on sa Vicente Sotto Memorial Medical Center.
Apan nianang pagkasunod adlaw namatay ang iyang anak.
Usa sa rason nga nakita ni Guardo nganong dili dayon maatiman sa mga ginikanan nga ilang mga nasakit nga anak kini gumikan sa gastos nga gikinahanglan sa pagpatambal bisan pa man sa pampublikong tambalanan.
Hinuon ang Cebu City Medical Center nagtanyag na karon og libreng mga serbisyo niadtong mga gidudahang may dengue ug kadtong naigo na niini, kini human sa pagkastigo sa city officials sa pamaagi sa maong tambalanan nga miresulta na hinuon sa kamatayon sa pipila ka mga pasyenteng madangat kanila.
Karong tuiga, mitala og 23 ka pasyente ang namatay sa maong sakit nga nag-edad gikan usa ka tuig ngadto sa 70 anyos adunahan ug dili, mas ubos hinuon kini kun itandi sa milabay’ng tuig.
Nunot sa maong gidaghanon, si Guardo miawhag sa publiko nga batasanon ang pagpanglimpyo sa palibot ug abagan sa kampanya batok sa maong sakit. - Edwin Ian Melecio (BANAT NEWS)