Balili lot way survey

CEBU, Philippines - Giangkon ni Provincial Assessor Anthony Sususco nga ang pagpalit sa 100 ka hektaryang luna sa Kapitolyo didto sa lungsod sa Barili wala ipa-ubos sa survey sama sa pagpalit sa 25 ka hektaryang lote sa pamilyang Balili sa lungsod sa Naga.

Sumala pa ni Sususco nga ang gikinahanglanon sa pagpalit sa maong luna mao lamang ang titulo sa yuta ingon man ang tax declaration.

“Titled property gani, dili na kinahanglanon ang survey,” matud pa ni Sususco kinsa daling miingon nga ang ilang buhatan mipahigayon hinuon og appraisal sa yuta sa wala hingpit nga gipalit sa Kapitolyo.

Si Sususco dili hinuon makasiguro kun 100 ka hektarya ba gyud ang lote nga napalit sa Kapitolyo didto sa Barili nga gitukoran karon sa tunghaan sa agrikultura sa kagamhanan sa probinsiya sa Sugbu.

Kini tungod kay niadtong mga panahona diin si Kongresista Pablo Garcia pa ang gobernador sa lalawigan, si Atty. Nicanor Enriquez pa ang provincial assessor ug dili siya.

Giangkon usab ni Sususco nga ang napalit nga dili mominus pito ka hektaryang yuta sa lungsod sa Minglanilla nga gitukoran karon sa housing project sa Kapitolyo wala gihapoy survey ug sa yuta sa Kapitolyo na nahimutang sa lungsod sa Carmen nga gitagana alang unta sa sanitary landfill tungod kay titulado gihapon ang maong yuta.

Si Sususco nagdumili hinuon sa pagtumbok kun pila’y kantidad sa pagpalit sa Kapitolyo sa maong mga luna kay wala pa niya matan-aw ang mga karaan niyang mga rekord sa iyang buhatan.

Apan iyang gitataw nga ang nag-facilitate sa pagkahalin sa maong yuta mao gihapon si Bokal Juan Bolo sanglit siya gihapon ang chairman sa provincial and municipal properties sa hunta probinsiyal. - Chester Abadilla (BANAT NEWS)