Lalaki gi-salvage

CEBU, Philippines - Patay’ng lawas sa usa ka lalaki nga gituohang gi-salvage nakit-an nga gilabay sa kasagbutan daplin sa dalan niadtong Martes mga alas 9 sa gabii didto sa Barangay Olango, lungsod sa Aloguinsan.

Ang maong patay’ng lalaki duna kini gitas-on nga 5”2 ngadto sa 5”4, pution, soliron og lawas, taas ug ilong, dunay patik sa walang bukton nga “Jun” ug naka-angkon og samad sa ulo, duha ka samad dinunggaban sa dughan, ug walang braso.

Si PO3 Jehaziel Huyo-a sa Aloguinsan Police Station nga gikahinabi sa Banat News nagkanayon nga duha ka mga lalaki nga nag-helmet nga nagsakay sa motorsiklo maoy gidudahang mipatay sa lalaki ug milabay niini didto sa daplin sa dalan.

Matud pa ni PO3 Huyo-a nga sa wala pa mahitabo ang krimen dunay usa ka habal-habal driver nga nakasunod sa mga wala mailhing mamumuno nga sakay niini ang lalaki apan gikatahong mihunong kini ug nagpakaraon-ingnon nga dunay gitan-aw sa motorsiklo hinungdan nga ni-overtake na lang usab kini.

Pipila ka minutos laing habal-habal driver gikan sa pikas barangay nga dunay sakay nga managtiayon nagkuyog sa pag-report ni Kapitan Dulcesimo Carang sa Barangay Olango nga nagpahibalo nga dunay usa ka tawong nangayo og panabang sa dihang ilang naagian daplin sa dalan ang patay’ng lawas sa gi-salvage. Samtang ang mga residente usab didto na sa lugar   nakabantay nga dunay motorsiklong mihunong sa awa-aw nga lugar apan wala nila panumbalinga ug mao na lay ilang nadungog nga dunay tulo ka boto sa armas.

Si Carang daling mimando sa iyang mga barangay tanod ug usa ka empleyado sa munisipyo ang gipahibalo nga maoy daling mitawag sa kapolisan pagpahibalo sa ilang nakit-an.

Sa dihang naabot ang mga sakop sa kapolisan sa Aloguinsan didto sa crime scene ilang nakit-an ang biktima nga naglunang na kini sa iyang kaugalingon dugo daplin sa dalan nga gibiyaan sa mga suspetsado nga wala mahibaw-i kun asa paingon.

Gibutyag niini nga gigulgol ang liog sa biktima, ug ang kasingkasing niini naigo usab sa pagdunggab, apan walay samad pinusilan gumikan kay ang samad niini sa ulo agi kini sa binunalan sa armas.

Nakuha didto sa crime scene ang tulo ka kabhang sa kalibre .45 samtang dunay usa ka bata didto sa lugar nga nakakita nga ang nag-helmet nga duha ka suspetsado nagsakay sa motorsiklo nga dunay tangke nga asul ang kolor. Nagtuo ang kapolisan nga gi-salvage ang biktima ug didto sa bukirang barangay gilabay gumikan sa kamingaw sa lugar, samtang ang mga silingang barangay wala usay mga kabanay’ng nahanaw hinungdan nga nanawagan sila karon sa kasikbit nga lungsod kun wala ba sila’y kabanay nga nahanaw sa pagsusi sa biktima. – BANAT NEWS