CEBU, Philippines - Puwerting pagkasikopa sa usa ka drug pusher dihang nasigpatan kini sa kapolisan didto sa barangay Poblacion, sa maong dakbayan sa miaging gabii.
Ang suspetsado mao si Joel Remedios Cabigas, 21, ulitawo, nga taga Poblacion.
Si Sr. Chief Insp. Seferino Tabay Jr., ang bag-ong hepe sa Intelligence section sa kapolisan sa Lapulapu mibutyag sa Banat News nga si Cabigas nasikop sa nagpatrolyang grupo sa kapolisan nga gipangunahan ni SPO2 Rex Cabrera .
Gumikan sa makapatahap kaayong lihok sa suspetsado, girekisa kini sa kapolisan ug didto nahinolan ang duha ka gagmay’ng pakete sa gituohang shabu ug sangkap sa paghingos niini sulod sa iyang bulsa.
Sa dihang gisukit sa kapolisan giangkon ni Cabigas nga mao pay pagsugod-sugod niya og pamaligya og shabu diha sa Lapulapu.
Si Cabigas nagpahayahay na karon sa prisohan sa maong dakbayan ug gipaabot ang kaso nga isang-at batok kaniya. - Bong Soriano (BANAT NEWS)