CEBU, Philippines - Duha ka tawo ang nabiktima sa pagpanunggab sa managlahing dapit ning dakbayan sa Sugbo sa miaging gabii.
Ang nalubaan didto sa dalan F. Jaca, sa barangay Inayawan mao si Perseus Abella, 27 , nga taga sitio Lumboy, sa Inayawan, samtang ang nalubaan didto sa barangay Guadalupe mao si Renyl Mancao, 28, nga taga B. Rodriguez St. , barangay Sambag II.
Matud pa ni SPO1 Henry Orbiso sa Cebu City Police Office nga si Abella, gituhaban og tulo ka dinunggaban sa bukobuko , samtang si Mancao, giluba og kausa sa buko-buko ug sa bitiis.
Si Abella giingong gidunggab sa wala hiilhing lalaki kinsa nasuko nga iyang gibadlong kay nagduwaduwa kini og armas de fuego sulod sa usa ka imnanan nga iya usab nga giimnan didto sa F. Jaca.
Samtang si Mancao giluba pag-unay sa iyang kainom nga nailhan lang niya nga Allan nga taga barangay Casay, lungsod sa Dalaguete.
Kini tungod kay nasuko lang ang suspetsado nga lain og tinan-awan kaniya ang mga nanag-inom sa imnanan nga ila usab nga giinoman didto sa Guadalupe.
Sa pagkakaron anaa na sa Cebu City Medical Center ang duha ka biktima samtang ang mga nakaluba kanila gipangita pa sa kapolisan.
Ang mga tigpaniid nagkanayon nga mao ni pago sa mga tawong palainom. - Lesley Caminade (BANAT NEWS)