CEBU, Philippines - Motukod og ad hoc committee ang mga sakop sa Hunta Probinsyal aron maoy mohimo og makuting pakisusi sa transaksyon sa Balili deal nga nakontrobersya karon.
Kagahapon sa gihimong special session sa Hunta gipahibalo ni Atty. Romeo Balili, ang Estate administrator sa Balili property ug mga sakop sa Appraisal Committee aron paghatag og dugang katin-awan sa maong deal.
Si Balili mipasabot kagahapon nga duna gyuy parte sa maong luna nga dili titulado apan wala kini maapil sa gibayran sa Kapitolyo.
Apan sa dihang gipangutana siya ni board member Jose Maria Gastardo bahin sa impormasyong nadawat nga dunay onse ka lote nga naapil sa deal nga walay mga titulo. Si Balili kusganong mihimakak niini.
Napakyas usab pagpresentar si Balili sa gipangayong certification sa bangko pagmatuod nga intact pa ang gibayad sa Kapitolyo nga P98 milyones.
Si Balili mibutyag nga verbal lang ang gipangayong certification sa manager sa maong bangko kay centralized kini apan kun siya’y pabut-on buot niyang mapresentar kini dayon.
Nagkauyon ang Hunta nga dunay lead committee unyang tukuron ug maoy moimbestiga aron mahibaw-an si kinsang mga opisyal sa Kapitolyo ang naka-komisyon sa deal.
Gipaabot unya nga ang komitiba ni Bokal Joven Mondigo Jr. nga committee on complaints and investigation maoy tahasan niini.
Samtang si Engr. Anthony Sosusco ang pangulo sa Cebu Provincial Appraisal Committee (CPAC) sa interbyu sa DyDD sayo kagahapon sa buntag mibutyag nga wala nila iapil og appraise ang dakong bahin sa Balili property nga dunay kabakhawan ingon man mga dapit nga naglubog sa tubig.
Gipadayag ni Sosusco mihimo sila sa pakisusi subay sa mando ni Bokal Juan Bolo nga maoy kanhi chairman sa Provincial and Municipal Properties nunot usab sa kamanduan ni Gobernador Gwendolyn Garcia. - BANAT NEWS