CEBU, Philippines - Usa ka construction worker nga nasuko nga gikawat ang mahalon niyang manok igtatari mipusil sa iyang silingan sa sitio Ibabao, barangay Agus, dakbayan sa Lapulapu sa miaging gabii.
Ang suspetsado giila nga mao si Danilo Caballero, alyas Dandan 35, minyo, samtang ang biktima mao si Marlon Jumangia Flores, 41, minyo, ug drayber sa PUJ nga pulos taga Ibabao.
Si SPO3 Rex Ybanes sa homicide section sa kapolisan sa maong dakbayan mibutyag sa Banat News nga naglakaw pauli sa ilang balay ang biktima dihang gipusil sa suspek ang bitiis niini.
Nasayran sa kapolisan nga maoy gidudahan sa suspetsado nga nangawat sa iyang manok ang biktima.
Gihatod dayon sa mga silingan ang biktima ngadto sa hospital samtang misibat usab dayon ang suspetsado nga maoy gipangita karon sa kapolisan. (BANAT NEWS)