Sapatero gipusil patay

CEBU, Philippines - Gipusil ug namatay ang usa ka mangangayo og sapatos samtang nagbarog gawas sa iyang shop diha sa Poblacion Ward-II kilid sa merkado sa lungsod sa Minglanilla niadtong Domingo sa alas 8:05 sa gabii.

Ang biktima mao si Filemon Marsalmolo Labiste, 52, minyo, pagpangayo og sapatos ang trabaho ug molupyo sa nahisgutang lugar samtang duna nay lead ang kapulisan sa mamumuno sa krimen.

Matud ni PO3 Allen Garciano sa Minglanilla Police dihang nahinabi sa Banat News subay sa imbestigasyon ang biktima nakit-an kining nagbarog gawas sa iyang shop dihang kalit lang gipusil sa mamumuno ug naigo sa luyong bahin sa ulo ug nahagba diha-diha dayong sibat sa suspek.

Gisuwayan pa unta pagtabang ang biktima ug gihatud dayun sa Minglanilla District hospital apan gideklarar nga dead on arrival sa mga doktor.

Sa pakisusi sa kapulisan samad pinusilan sa luyong bahin sa ulo agi sa wala pa matinong kalibre sa armas ang hinungdan sa hinanaling kamatayon niini.

Atol sa pagsukitsukit sa kapulisan sa asawa sa biktima nga wala makuha ang pangalan, nahibaw-ang sa wala pa ang hitabo nianang pagka- adlawan nagkakita kini og lalis sa kakompitensyang tig-ayo usab og sapatos kabahin sa ilang pag-ilogay og kostumer.

Dugang inpormasyon nga nahibaw-an sa kapulisan nga ang mao nga tawong iyang gikalalis midangop usab sa buhatan sa kapulisan human sa ilang panag-lalis nianang adlawa.

Pagkakarun padayon pa ang imbestigasyon sa kapulisan ug apil sa imbestigahon mao ang kakompetinsya niya sa negosyo kun may kalabutan ba kini sa krimen ug ang pagpangita sa usa ka lalaking giingong nakasaksi sa pagpamusil.

Sa paghimo ning balita gipugngan lang una sa kapulisan ang pangalan sa karibal nga mangayohay og sapatos samtang padayun pa ang imbestigasyon sa hitabo.   (Darrel Carumba)