LBC outlet sa Moalboal gilungkab

CEBU, Philippines - Wala mailhing manglungkabay ang misakiyo sa P27 mil   nga kita sa LBC Express nga nahimutang sa Poblacion East lungsod sa Moalboal kagahapon sa kaadlawon.

Sa report nga nadangat sa Operation Branch sa Cebu Provincial Police Office (CPPO) usa ka Jose Plarisan, 27, empleyado sa maong kompaniya maoy nipahibalo sa Moalboal Police Station.

Matud pa nga kagahapon sa kaadlawon si Plarisan gikatahong nagsuroy-suroy sa public market uban sa iyang duha ka mga higalang babaye apan dihang nahiagi sila sa iyang gi-trabahoan nga LBC Express nabantayan niining nahanaw na ang padlock sa roll-up door.

Gumikan sa iyang kahingawa isip usa ka trabahante, iyang gisuwayan sa pag-alsa ang maong pultahan ug iyang nasutang guba na ang bildong purtahan sa sulod ug nahanaw usab ang steel vault.

Sumala pa sa kapolisan human sa ilang imbestigasyon dunay sulod nga P27 mil nga cash nga kinitaan ang maong steel vault.

Sa gipahigayong imbestigasyon sa kapulisan sa nahisgutang lungsod nasuta nga ang wala mailhing kawatan nakasulod sa maong buhatan pinaagi sa pagguba sa kandado nga giligwatan og bara de kabra.

Nihimo na karon og follow-up operation ang kapulisan sa nahisgutang lungsod aron sa pag-ila sa mga suspetsado. (Guam Logroño) (BANAT NEWS)